Nuk është gjë e zakonshme për shqiptarët që të mos njihen në çdo vend të botës për ndonjë ngatërresë që shkaktojnë. Këtë rradhë, na qenkërka një bandë shqiptare me të mitur.

Policia e Athinës arrestoi 26 persona, nga të cilët 22 janë shqiptarë, ndërsa 4 grekë. Nga të gjithë të arrestuarit, 21 janë në një moshë të mitur. Anëtarët e bandës vepruan kryesisht në Sheshin Syntagma, Sheshin Laou, Thiseio dhe pjesë të tjera qendrore të kryeqytetit helen.

Nga policia e vendit fqinj u arrit në përfundimin se banda e grabitësve kishte një strategji për vjedhjet e dhunshme që kryente. Ata ishin ndarë në disa grupe, në pjesë të ndryshme të Athinës, ndërsa “viktimat” e tyre ishin kryesisht të miturit. Pastaj, banda e hajdutëve, duke përdorur dhunë e mizori ekstreme, iu merrnin qytetarëve celularët, paratë dhe sendet me vlerë.

Disa nga anëtarët e grupit ishin lënë të “punonin” si roje, të shikonin policinë, me qëllim që të mos arrestohen. Pjesëmarrja e anëtarëve të bandës në një numër të mjaftueshëm grabitjesh po hetohet, ndërsa deri më tani të paktën 8 raste janë identifikuar, të cilat ndodhën gjatë muajit të fundit. Përpos vjedhjeve, 2 prej anëtarëve të bandës së shkatërruar tashmë po hetohen për trafik droge.

Operacioni për arrestimet e të miturve u krye nga Nën-drejtoria e Policisë së Atikës. Gjatë operacionit, u sekuestruan celularë, para të gatshme dhe hashash. Të arrestuarit u akuzuan për krijimin e organizatës kriminale, grabitje, dëmtim i rëndë trupor dhe për shkelje të ligjit për armët dhe drogën.

Të prangosurit janë dërguar në Prokurorinë e Athinës.

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu