Hipokrizia mund të zgjasë, por në fund gjithçka e gjithkush e tregon pamjet e vërtetë. Kështu ka ndodhur edhe tani, fiks dy vite pas dërgimit të delegacionit të 30 mjekëve shqiptarë për të luftuar kundër Covid-19 në Itali.
E përditshmja italiane  “Corriere della Sera” ka ngritur pikëpyetje për qëndrimin e skuadrës së mjekëve shqiptarë, të cilët u zhvendosën për një muaj në shtetin fqinj në një tentativë, më tepër propagandistike se mjekësore, për të ndihmuar me krizën e pandemisë Covid-19. Shkrimi denoncues i Corriere della Sera hapet me një pyetje mbi nevojën e këtyre mjekëve shqiptarë në shërbim të shtetit fqinj.
“Shqiptarët ishin miq në Brescia, siç qe dhe ekipi i mjekëve rusë duke na kushtuar 3 milionë euro. Po a ishin të nevojshëm?”, bën një pyetje retorike gazeta.
Duke e paralelizuar misionin tonë me atë rus, ku shumica e këtij të fundit përbëhej nga spiunë, Corriere della Sera shkruan se as skuadra shqiptare nuk është treguar korrekte gjatë qëndrimit të saj.

“Tashmë janë bërë të njohura ahengjet me pije alkoolike të shqiptarëve në hotelin e tyre në Brescia, madje edhe gjobat e majme që morën për grumbullimet, masa këto që çuditërisht u ‘zhdukën’ falë marrëveshjeve mes dy qeverive, asaj shqiptare dhe italiane”, vijon gazeta.
Sipas medias italiane, që në nisje të këtij misioni drejt Italisë, nuk u krye asnjë hetim mbi personat që udhëtonin e aq më pak se sa para ata kishin me vete, Gazeta shkruan se arsyeja përse u veprua në këtë mënyrë është ende e paqartë, pasi misioni rus nga ana tjetër ishte nën vëzhgimin konstant të karabinierëve italianë. Ndoshta kjo shpjegon edhe arsyen pse në mes të mjekëve u infiltrua dhe një punonjës karburanti.
Në vijim, shkrimi i së përditshmes italiane aludon se në këtë pjesë mund të ketë ndihmuar përfshirja e një prej personave më të besuar të kryeministrit Rama, avokatit Ëngjëll Agaçi, shpesh i përfolur si “mbrojtës i narkotrafikantëve të mëdhenj shqiptarë.”
“Njeri i dëgjuar shpesh nga isntitucionet tona, emri i të cilit u shtua jo gabimisht për të udhëtuar në bordin e avionit që udhëtoj brenda Italisë drejt Lombardisë. Pas mbërritjes së tij në Romë, në vëzhgimin e mjekëve shqiptarë u angazhua Guardia di Finanza”, shkruan Corriere della Sera.
Media e shtetit fqinj shkruan se analistët ndërkombëtar e kanë sintetizuar mbërritjen e delegacionit shqiptar në Itali si një lëvizje gjeopolitike e manovër diplomatike të kryeminstrit Rama për të fituar pikë në arenën ndërkombëtare. Me katër fjalë e përmbyll shkrimin e saj mbi qëndrimin e delegacionit shqiptar Corriere della Sera: “nuk dhanë asnjë kontribut”.

Por sot, dy vjet më pas, ne mund të masim përtej daulleve propaganistike se sa qe zhurma dhe se sa kontributi. Ajo e para arriti kulmin në një “sondazh” që organizoi televizioni Report TV ku Rama dilte lideri më i preferuar ndërkombëtar mes italianëve, duke lënë pas Merkelin dhe Putinin.


Në atë kohë në mediat tona buçisnin titujt e shtypit italian që e quanin aktin e Ramës si “mësimin shqiptar” (ndaj Evropës), apo “një mrekulli e Zotit” .
Vetëm më pas gjakrat u ulën dhe në një intervistë Ministri i Jashtem italian, Di Maio pranoi se Edi Rama,  ishte vetëofruar të sillte një grup mjekësh sepse Shqipëria nuk kishte ende nevojë për të gjitha rezervat.
Por kur disa zëra kritikë në shtypin shqiptar i artikuluan këto kritika ata u vunë nën shënjestrën e makinerisë së propagandës. Kësaj radhe është një media serioze italiane si “Corriere della Sera” e cila jo vetëm përmend rastin e punonjësit të benzinatës, dhe gjobat që morën mjekët shqiptarë si pasojë e thyerjes së rregullave, por vë në dukje edhe se “mbërritjen a delegacionit shqiptar në Itali ishte një lëvizje gjeopolitike apo manovër diplomatike të kryeministrit Rama për të fituar pikë në arenën ndërkombëtare”.

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu