Biznesi i ryshfeteve është zgjeruar ndjeshëm në 6 vitet e fundit teksa kompanitë shqiptare janë detyruar të paguajnë më shumë nën dorë për zyrtarët e shtetit.

Ky është përfundimi që vjen nga Banka Botërore dhe që citohet nga Top-Channel.

Një herë në çdo 6 vjet, Banka Botërore kryen të ashtuquajturin vrojtimi i sipërmarrjeve, në të gjitha vendet e Europës Lindore dhe Azisë Qendrore, ku kompanitë pyeten për çështje kyç që lidhen me klimën e biznesit si korrupsioni, taksat, krimi dhe ambienti rregullator.

Por cilat janë rezultatet për vitin 2019, sipas Bankës Botërore?

Sipas Bankës Botërore për vitin 2019, mbi 36% të bizneseve shqiptare u është kërkuar të paktën një herë ryshfet nga zyrtarët e shtetit. Kjo shifër është tre herë më e lartë se mesatarja e rajonit dhe mbi dy herë më e madhe se sa mesatarja botërore, raporton Top-Channel.

Por, përtej krahasimi me vendet e tjera, korrupsioni është përkeqësuar edhe në kohë.

Sipas Bankës Botërore, krahasuar me vitin 2013, frekuenca e ryshfeteve është rritur me gati dy herë, nga 20.6% që ishte atëherë në 36.1% sot.

Madje frekuenca aktuale e ryshfeteve, sipas Bankës Botërore është më e lartë edhe se sa në vitin 2005.

Banka mat një sërë treguesish që lidhen me korrupsionin. Përveç kërkesave për ryshfet, ajo mat edhe thellësinë e këtij treguesi, përqindjen e kompanive që japin para nën dorë për inspektorët e taksave si dhe atë të bizneseve që japin dhurata për të marrë kontrata nga qeveria.

Të gjithë këta tregues janë përkeqësuar në rend dyfish, përveç peshës së firmave që japin dhurata për të marrë kontrata publike, e cila është ulur nga 39.5% që ishte në vitin 2013 në 15.3% aktualisht.

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu